بعد نحو عام من رحيل الموسيقار اللبناني زياد الرحباني، خرجت شقيقته المخرجة ريما الرحباني عن صمتها وتحدثت عن علاقتها بشقيقها الراحل وما أثير عن قطيعة الثنائي.
ورحل الموسيقار اللبناني يوم 26 يوليو من العام الماضي 2025، بعد أزمة صحية مفاجئة.
ريما الرحباني تكسر صمتها
قالت المخرجة اللبنانية إنها قررت أن تخرج عن صمتها للحديث مع غير المحبين الذين يعملون على الاصطياد في الماء العكر.
وأوضحت ريما أنها لم تكن في حالة جيدة وقالت: "إنّي إلي فترة طويلة كتير غايبة عن السَمَع وعن الحضارة وعن التواصل الاجتماعي والغير اجتماعي، ويمكن عن الوعي كمان".
وأكدت أنها لا تعلم شيئًا من الأحداث حولها وأنها انقطعت عن التواصل مع الجميع حتى الأصدقاء. وقالت ريما إن العلاقة في منزلها بُنيت على الحب والصدق وقالت: "الصِدق هوّي اللي بيِخلق الحُب".
وأوضحت المخرجة اللبنانية أن علاقتها بشقيقها الراحل كانت ممتازة وقالت: "علاقتي بزياد مُمْتازة، من أوّل العُمر لآخر العُمر".
سبب قطيعة ريما وزياد
وتحدثت ريما عن القطيعة مع شقيقها وقالت في منشورها عبر "فيسبوك": "صار قَطيعة بيني وبينو، وبينو وبين فيروز إي صَحْ صار. وبِكل بيْت بتْصير وبتْصير كتير.. فا صحيح صار إنّما لأسباب عابِرة وعَبَرت.. بس مش متل كل بيت لأن بيتنا تحديداً مُسلّطة عليه الأضواء، رغم إنّو ما حدا منّا، وَبيدون إستثناء بيحبّا للأضواءْ، متلما مسلّطة علينا العيون المَسنونة والعيون اللي بَتصيبْ وبتِحسُد وبِتغارْ".
وعن سبب القطيعة بينها وبين شقيقها الراحل قالت: "السبب الأساسي للقطيعة كان إنّو زياد عِمل تصريحات خاطئة عن أهلو اللي هنّي أهلي بنفس الوقت! وما بعرف لأي سبب أو مين ورَّطو فيها!! وأنا ما تحمّلتا لأن بعرف تماماً إنّها خاطئة، إنّما رح تؤخذ على إنّها حقايق، وهيّي أبعَد ما يكون عن ذلك".
وأضافت: "ردّيت عليه هون عا صفحتي وقلت إنها تركيبات زياديّة. لأن زياد بالحقيقة ما فِشي بِ سِرْ ولا سرّب حقيقة! زياد قال شي عن أهلو هوّي يمكن كان بيتمناه أو حدا ورّطو فيه لأن قلبو طيّب! وبيفكر الناس متلو طيّبين! فا بِمُجرّد ما ردّيت صارت القطيعة بيني وبينو".
وتابعت ريما: "وانْهَالِت من قِبَلو المقابلات اللي ما بتخلص واللي كلّا خاطئة ومش حقيقية عن البيت وأهل هالبيت، وخصّصني إلي بالحصّة الكبيرة". وقالت إن الأمر انتهى بالنسبة لها بمجرد عدم الانجرار إلى الرد.
علاقتها بشقيقها زياد
نفت ريما صحة ما تداوله البعض عن عدم حب شقيقها زياد لها وكتبت:"امّا لحدا يقول زياد ما بيحبّني فاغلطان كتير زياد بيحبّني لدرجة ما حدا بيقدر يتخايلها، بس بقيت براسو إختو الزغيرة اللي كان يألّفلا قِصَص تا يخبّرا ياهن ويموّتها ضحك قبل النوم بإيّام البرد، واللي كان يحَرْقصها بكل شاردة وواردة، واللي كانت تُنطرو تا يِرجع من المدرسة جايِبلها علكة بازوكا مدري بوزوكي شي من هالنوع، واللي كان يدرّسها إشيا ما إلُن علاقة بدرس المدرسة".
وتابعت: "واللي كان يصوّرها عا الطالع والنازل، واللي كان يطلب منها تعمل القهوة إلو ولصحابو تا يِتباهى قدّامن إنّو أختي بِتْطَلّع القهوة عالدرج بال باتان بيدون ما توقّع نقطة".
وتحدثت عن علاقتهم الفنية وقالت: "كنت بالنسبة إلو الإخت اللي بيِحترم رأياً الفنّي كتير واللي بيَعرِف تماماً إنّو إذا في شي لاء هيّي الوحيدة اللي رح تقِلّو لاء، مَهما كان الثمن! ومش رح تطيّبلو أبداً متل كل اللي حواليه، مِنهن لأن دجّالين وما بيهمّن إلا إنّهن يِبقوا حدّو ويِسًرقوا ضَوْ ومِنهن عن محبّة يخافوا يزعّلوه".
وردت ريما الرحباني على ادعاء البعض عدم حبها لشقيقها وقالت: "ولحدا يقلي ما بحِبْ زياد، هاي يمكن مزبوط وصحيحة أنا ما بحبّو، أنا بِعبَدو فا حاج تِنبَحوا وتدِسّوا خبار وسُموم لَوْ إنّها كائنة عا لسانْ زياد بمقابلاتو إلو لأن قالا ونِدِم عليها لأنّو هوّي أكتر واحد بيَعرِف إنّها مش صحيحة، وحِلّوا عنّو وما تِدِخلوا بشي ما بيخصّكُن".
تكريم زياد الرحباني
أكدت ريما أنها ترفض تكريم شقيقها الراحل وقالت: "والأهم حاج بقى تكريم لزياد! إلكُن سنة عم تِسرحوا وتِمرحوا، سا سوفّي! قِلتا وبرجع بقولا ورح ضَلْ قولا، اللي بدّو يكرّم لازم يكون مينيموم من مُستوى المُكَرَّم وطلوع، مش مُتعَربِش عليه ونزول! التكريم بهالحالات بيكون ببَثْ أعماله الحقيقيّة بصيغتها الأساسيّة اللي هوّي نفّذا وكان عليها كل ما عدا ذلك إسمو تعربُش وحُب الظهور وإفلاس فنّي وإستجداء عواطف ولايكاتْ فعليّة و/أو أنتِرنَتيّة ومصاري".
(المشهد)